Чăваш Республикин вĕренÿ тата çамрăксен политикин министерствин хушăвĕпе килĕшÿллĕн 2017 çулхи çу уйăхĕн 4-мĕшĕнче Чăваш Республикин вĕренÿ институчĕнче наци культурин «Туслăх хĕлхемĕ» («Искорка дружбы») фестивалĕн вĕçлекен тапхăрĕ иртрĕ. Фестиваль программинче чӑваш тата вырӑс шкулӗсеннче вӗренекенсем валли чӑваш чӗлхипе тата культурипе ирттерекен «Ҫӑлтӑрчӑк» вӑйӑ конкурс тата ӳнер ӑсталӑхӗн «Шевле» конкурсӗ пулчӗ. Ăмăртăва 50 яхăн шкул ачи пухăнчĕ.
Фестивалĕн «Çăлтăрчăк» вăйă конкурсăн регион тапхăрне район е хула шайĕнче малти вырăна тухнă 6-8 классенче вĕренекенсем хутшăнчĕç. Кашни ачан 5 станци иртмелле пулчĕ:
1) «Чĕлхе – халăх мулĕ» станци,
2) «Çут çанталăка сыхласа çын хăйне сыхлать» станци,
3) «Тăван кил ăшши – атте-анне ăшши» станци,
4) «Илемлĕх тĕнчи» станци,
5) «Пирĕн пултарулăх» станци.
Ăмăртура район чысне Хĕрлĕ Чутайри вăтам шкулта 7А класра вĕренекен Матвеева (ертÿçи– чăваш чĕлхипе литература вĕрентекенĕ Васильева) хÿтĕлерĕ. Матвеева хăйĕн мĕн пур пултарулăхне кашни станцире кăтартрĕ. Уйрăмах «Тăван кил ăшши – атте-анне ăшши» станцири жюри членĕсем вĕренекен хăй çырнă сăвви килĕшнине палăртса хăварчĕç. Пилĕк станци балĕсене хушнă хыççăн пултаруллă хĕр ача чӑваш шкулӗсенче вӗренекенсем хушшинче 2-мĕш вырăн йышăнчĕ. Матвеева хăйне шанса панă ĕçе тивĕçлĕн пурнăçларĕ. Маттур. Эпир ăна хĕрÿллĕн саламлатпăр, çĕнĕ çитĕнÿсем тума ăнăçу сунатпăр.
«Туслӑх хӗлхемӗ» фестиваль пуриншӗн те чӑннипех уяв пулчӗ, вӗренӳре те, пултарулӑхра та шанӑҫ паракан ачасем пуррине кӑтартрӗ.