Хĕрлĕ Чутайри вăтам шкула ачасем район центрĕпе çывăхри ялсенчен кăна мар, аякри ялсенчен те вĕренме килеççĕ. Инçе çула çывхартса кашни кун шкула çỹрекеннисенчен пĕри вăл - 10 Б класра вĕренекен Сергей Анатольевич Праулов.

Сергей Праулов Хĕрлĕ Чутай шкулĕнче 2017 çултанпа вĕренет, унччен вăл Хусанушкăнь шкулĕнче пĕлỹ илнĕ. Аван вĕренсе пыракан, темĕнпе те кăсăкланакан, ырă тĕллевсем патне туртăнакан яш пирки вĕрентекенсем лайăххине кăна калаççĕ.

Хусанушкăнь шкулĕнче вĕреннĕ чух Сергей космоспа кăсăкланма пуçланă, çамрăк техниксен пултарулăх конкурсĕсене хутшăннă. 2017 çулта вăл республикăра иртнĕ "Дорога к звездам" конкурсра 1-мĕш вырăн йышăннă, 10-мĕш Николаев вулавĕсен дипломанчĕ пулнă.

Сергей темĕнпе те кăсăкланнине вăл ялхуçалăх çыравĕ енĕпе е заповедниксем пирки шкул ачисен викторинисене хутшăнса малти вырăнсене йышăнни те çирĕплетет. Географипе наукăпа практика конференцине хутшăнмалла-и, Чутай тăрăхĕ пирки электронлă ĕç çырмалла-и, районти фестивальте чăвашла сăвă вуламалла-и - Сергей Праулов пур çĕре те ĕлкĕрет.

Пултаруллă çамрăк 2016 çулта район администрацийĕн пуçлăхĕн стипендине илсе тăнă. Кăçал вара Сергей Праулов Чăваш Республикин Пуçлăхĕн Михаил Игнатьевăн ятран паракан стипендине илсе тăрать. Çакă ăна малашне тата пысăкрах çитĕнỹсем тума хавхалантарасса шанатпăр.

А.КАРПОВА.