Октябрĕн 18-мĕшĕнче "Артекра" Пĕтĕм Раççейри ГТО фестивалĕн финалĕ старт илнĕ. Спорт уявĕ виçĕ эрнене тăсăлать. Ăмăртăвăн тĕп парнисемшĕн Раççейĕн тĕрлĕ кĕтесĕнче пурăнакан çамрăк спортсменсем тупăшĕç.

Чăваш Республикин сакăр ачаран тăракан пĕрлештернĕ команди йышĕнче Хĕрлĕ Чутайри вăтам шкулта 5 А класра вĕренекен Вадим Иванов та пур. 12 çулхи арçын ача кăçал çулла ГТО фестивалĕн регионти тапхăрĕнче хăйĕн ỹсĕмĕнче чи лайăх кăтартупа палăрса "Ĕçпе хỹтĕлеве хатĕр" комлексăн ылтăн паллине тивĕçсе республикăн пĕрлештернĕ командин йышне кĕме пултарнă.

Палăртмалла, çамрăк спортсменсем Шупашкартан Мускава, унтан Мускавран Симферополе çити самолетпа вĕçнĕ. Хальлĕхе вĕсем шкул программипе килĕшỹллĕн вĕренеççĕ тата канаççĕ. Ăмăртусем çитес вăхăтра пуçланмалла. Шкул ачисем Крымра ноябрĕн 7-мĕшĕччен пулĕç.

А.ТИМОФЕЕВА.