Мĕнле пуян чăваш тĕрри, —
Унта пин-пин çулсен йĕрри,
Унта хăват илет çĕнни,
Çынсем ĕмĕртенпе кĕтни.
В.Давыдов-Анатри
Чăваш тĕррин сайра йышши культура еткерлĕхне упраса хăварас тĕллевпе Чăваш Республикин Пуçлăхĕн Олег Николаевăн указĕпе Чăваш тĕррин кунне чÿк уйăхĕн 26-мĕшĕнче ирттерме йышăннă. Çак куна халалласа ZOOM платформăра чÿк уйăхĕн 25-мĕшĕнче район шайĕнчи ăслăлăхпа практика конференцийĕ иртрĕ. Ку мероприятие чăваш чĕлхи вĕрентекенĕсемпе пултаруллă шкул ачисем хутшăнчĕç. Конференци икĕ секцире иртрĕ: ăслăлăх секцийĕ тата пултарулăх секцийĕ. Пĕрремĕш секцире ачасем тĕпчев ĕçĕсене хÿтĕлерĕç. Иккĕмĕшĕнче вара хăйсем çырнă хайлавсене илемлĕ вуласа пачĕç, видеороликсемпе паллаштарчĕç, ÿкерчĕксен шухăшне уçса пачĕç.
Пирĕн шкулти ачасем те конференцие мĕн пур кăмăлтан тăрăшса хатĕрленчĕç. Пĕрремĕш секцире 11А класра вĕренекен Диана Матвеева тата Даниил Альгешкин «Альгешкина Е.С. – ăста тĕрĕçĕ» тĕпчев ĕçне хÿтĕлерĕç. Жюри членĕсене асăннă ĕç кăмăла кайрĕ, ăна 9-11 классенчи ачасен ÿсĕмĕнче 1-мĕш вырăн пама йышăнчĕç. Иккĕмĕш секцире ĕçлекенсен йышĕ пысăк пулчĕ. 7А класра вĕренекен Арсений Абакумов хăй çырнă «Чăваш тĕрри» сăвви тăрăх видеоролик ÿкерсе 7-8-мĕш классем хушшинче 1-мĕш вырăна тивĕçрĕ. 9-11 классенчи ачасен ÿсĕмĕнче 11 А класра вĕренекен Никита Чамжайкин «Çĕр пин тĕрĕ çĕрĕ-шывĕ» видеороликпа паллаштарса 1-мĕш вырăн йышăнчĕ, 10-мĕш класра вĕренкен Сергей Вазин «Чăваш тĕнчи – эрешре» видеоролик йĕреклесе – 2-мĕш вырăн. Ăста ачасем хăйсен ÿкерчĕкĕсемпе жюри членĕсене тыткăнларĕç. 7-8-мĕш классем хушшинче 7Б класра вĕренекен Екатерина Ишмендерова «Ăсамлăх» ĕçĕпе 2-мĕш вырăна тивĕçрĕ. 9-11 классем хушшинче 9Б класра вĕренекен Ирина Иванова «Çыруллă кĕпе» ĕçĕпе 1-мĕш вырăн йышăнчĕ. Çак класрах вĕренекен Мария Инжебейкина «Тĕрĕ - кил ăшши» ÿкерчĕкпе – 2-мĕш вырăн.
Эпир, чăваш чĕлхи тата литература вĕрентекенсем, конкурса хутшăннă пур ачана та пĕтĕм кăмалтан тав тăватпăр, малашлăхра ăнăçу сунатпăр. Чăвашлăх туйăмĕ сирĕнте ан иксĕлтĕр.
Васильева М.Н., чăваш чĕлхи тата литературине вĕрентекенĕ